Diay lungob
Updated by Tribune on Jan 10 2009 04:07:38 PM

Ti kunada nga lungob iti 'english' ket 'hollow.' Idiay tapaw wenno tuktok ti Quirino Hill ket ada ti lungob nga addaan ti sumagmamano a babbalay. Idi, daytoy a lungob ket adda kuweba na nga sumagepsepan ti danum ti todo ngem idi inmado ti babbalay ti arubayan na ket inkapilitan da nga binarahan diay kuweba ta delikado para kadagiti residente nagnangruna kadagiti ubbing nga aga-ayam. Gapu ti panakabara na, naawanen met diay lumusutan ti danum nga apan lungob no tiempo ti panagtodo ket kas resulta na, adda pinmarang nga duwa a problema kas ti 'stagnant water' ken nangalawngaw nga karag a istorbo nangnangruna kadagiti matmaturog ti rabii no kasta a tiempo ti panagtodo. Gapu kadagitoy adda kanal a 'drainage' nga inaramid ti residente sadiay igid ti lungob nga agturong idiay Cogcoga, Pico, La trinidad ket isu metten ti agay-ayusan ti danum-todo isu nga tunggal tiempo ti panagtodo ket awan metten piman ti 'stagnant water' ken karag.

Daytoy gayam nga lungob, kas kuna iti maysa a residente sadiay ket naituding nga dalanen ti maysa a 'proposed national road' manipud East Quirino Hill hanggang idiay Dreamland, Pico, La Trinidad. Daytoy kano a 'proposed road' ket adda apektaran na a maysa a klinik ngem kuna ladta daytoy a residente a mabalin met a maire-'locate' daytoy a pasilidad. Nalpas kano a naisubmit ti 'proposal' na, naaprubaran ken naponduanen met kano daytoy a proyekto ngem hanggang tatta saan paylang nga nakonkreto diay parte na idiay lungob ken ti nayon na hanggang idiay West Quirino Hill. Kas kuna dagiti 'community leaders,' mas rumbeng paylang piman a mailpas pay umuna dagiti 'priority projects' para met lang iti pagsayaatan ti kumunidad ken ti kaaduwan isu nga dagiti 'priorities' pay ti inmuna a naileppas nga no ayanna ket isu ti naiusaran pay iti pondo.

Naminsan, napanak idiay lungob ket nakitak a kadawian langen a maysa a normal a lugar idiay tapaw. Natalna ken natalged piman ngem no pansinem idiay igid na a nakaiyaramidan ti kanal ken ti kaabay na a pagnaan ti tao ket kas kuna ti maysa a residente sadiay ket mapa-'flood' kano diay parte ti pagnaan nga nababa ken diay nangato ket tambak a pitak nga maging lutak no tiempo ti panagtodo isu nga haan a mapagnaan ti tao no kasdiay a panawen isu nga adda ladta met gayam ti kurang pay a dapat a mailpas. Mapa-'flood' daytoy a parte ta aglupyas diay kanal nga naaramid ta hanna kabaelan a kargaen ti danum-todo a magapu ti adu a lugar nga adda iti ngato na. Kuna pay dayoty a residente a sisasagana da a agbayanihan no adda kuma makayat nga agdonate ti materyales kas dagiti semento, darat, graba, ken 'steel bars' tapno maipangato ken makonkreto daytoy a pagnaan tapno saanen nga lutak ken ma-'flood' no panagtodo.

Entayo piman binarahan diay kuweba a lumnekan ti danum-todo isu nga no mabalin ket entayo met kuma isimpa nga usto ti amin a naipaay na a problema ta awan ti makuna a basol tayo gapo ti panagbiyang tayo ti batawa. Ket babaen man garud iti daytoy nga artikulo ket kayat ko nga uliten manen a kumiddaw iti tulong wenno donasyon para kadagiti naibaga a materyales manipud kadagiti pribado a indibidwal wenno grupo, ket no siyasinnuman ti agipaay ti tulong ket mabalin yo nga i-'coordinate' kadagiti residente sadiay lungob wenno/ken kadagiti opisyales ti barangay para iti panakai-trabaho na tapno maaramid nga usto daytoy a pagnaan.

Baro manen a tawen ket sapay kuma ta makaipaay tayo iti pagsayaatan ken ayat para iti maysa a komunidad ta isu met laeng daytoy iti maysa nga usto ken nabanor a pakaragsakan tayo ken ti amin.

Happy New Year!